Евролигата се менува со преминот кон франшизен модел, при што напуштањето на натпреварувањето во иднина ќе има исклучително висока цена.
Евролигата го потврди почетокот на транзицијата кон франшизниот модел, задржувајќи ги сите 13 акционерски клубови во својот состав, вклучувајќи го и Реал Мадрид.
Едно од клучните прашања во оваа трансформација е тоа што напуштањето на Евролигата, по преминувањето кон франшизен систем, ќе стане исклучително скапо за секој клуб.
Се очекува клаузулата за откуп за напуштање на натпреварувањето да се зголеми на 100 милиони евра, но таа сума би можела да достигне и до 200 милиони евра.
Вистина е дека следната сезона, додека проектот – НБА Европа е сè уште во фаза на планирање, најдобрите европски клубови ќе мора да играат во елитно натпреварување, а Евролигата во моментов е единствената реална опција. Затоа, клаузулите за излез сè уште ќе постојат.
Ова значи дека клубовите кои сакаат да се приклучат на новото натпреварување ќе имаат можност да ја напуштат Евролигата, но ќе мора да платат соодветна цена.
Моментално, клаузулата за откуп изнесува 10 милиони евра, со дополнителна компензација за настанатата штета, а тој дел почнува да достигнува нивоа што никогаш порано не се видени во европската кошарка.
Клучната ставка е токму формулацијата „со компензација за штета“, која, во зависност од растот на пазарната вредност на Евролигата, веќе следната година би можела да достигне 200 милиони евра.
Секако, имајќи предвид дека финансиските износи што се појавуваат во европската кошарка во последните години стануваат поголеми и понезамисливи во споредба со периодот од само две години, дури и сумата од 200 милиони евра наскоро би можела да изгледа скромна.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
