Кожуф и Башкими одиграа срамен натпревар во 28. коло во Втората македонска фудбалска лига во кој, триумфираа гостите со 1-2 со гол во последните минути од средбата, кој беше буквално подарок на домашните фудбалери кои стоеја на терен за кумановци да дојдат до победа.
Погодокот кој ја шокираше фудбалска Македонија предизвика бура во домашната спортска јавност, а со свој став се огласи и Фудбалската федерација на Македонија од каде информираат дека „по целосните извештаи од официјалните лица на натпреварот, ќе бидат преземени сите мерки во рамките на нашата надлежност. Во соработка со МВР и надлежните институции ќе биде преземено се што е потребно ваквите случаи да добијат соодветен епилог“.
А, дека Башкими во договор меѓу двете екипи треба да победи беше очигледно и низ ситуација претходно на натпреварот во која повторно домашните беа „замрзнати“ на терен, но гостите во тој случај не успеаја да погодат.
СООПШТЕНИЕТО НА ФФМ ПО СКАНДАЛОЗНИТЕ СЛУЧУВАЊА НА НАТПРЕВАРОТ ВО ГЕВГЕЛИЈА ВИ ГО ПРЕНЕСУВАМЕ ВО ЦЕЛОСТ:
Фудбалската федерација на Македонија (ФФМ) со длабоко разочарување и огорченост го следеше натпреварот помеѓу ФК Кожуф и ФК Башкими од Втора МФЛ.
Сцените што сите ги видовме на теренот и однесувањето на поединци претставуваат директна навреда за фудбалот, за фер-плејот и за сите што со чесна намера учествуваат во спортот.
Она што го видовме е срамно и неприфатливо.
Ова раководство на ФФМ нема да дозволи ваквите појави да станат норма, ниту да поминат без последици.
Очекуваме целосни извештаи од официјалните лица на натпреварот, по што ќе бидат преземени сите мерки во рамките на нашата надлежност.
Нема да има заштитени – секој што со своето однесување го нарушил интегритетот на натпреварувањето ќе биде соочен со одговорност.
Нашата цел е јасна: фудбал без дамка, натпревари во кои резултатите се одлучуваат на теренот, а не зад кулисите.
ФФМ останува цврсто определена да стави крај на нечесните практики и да го врати достоинството на македонскиот фудбал.
Време е конечно да расчистиме со ѓубрето што со години го труе македонскиот фудбал.
Во соработка со МВР и надлежните институции ќе преземеме сè што е потребно ваквите случаи да добијат соодветен епилог.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
