Меѓународната автомобилистичка федерација (ФИА) и нејзината Комисија за Формула 1 официјално потврдија дека, почнувајќи од следната сезона, должината на трките за Големата награда ќе се намали од 305 на 290 километри.
ФИА најави промени во правилата на Формула 1, вклучително и скратување на трките и одлука да се отфрлат некои од предложените измени во дизајнот на менувачот. Во одделни соопштенија, ФИА и раководството на Формула 1 објаснија дека ова намалување е неизбежна последица од претходната одлука во врска со протокот на гориво во моторот.
Според тоа, главната причина за скратувањето на трките е од техничка природа и е поврзана со новите погонски единици. Промените во правилата за моторите го менуваат односот на моќност помеѓу моторот со внатрешно согорување и системот за електричен погон. Со зголемувањето на протокот на гориво, болидите ќе трошат повеќе гориво.
Поради буџетски ограничувања (финансиски лимити), многу тимови сакаат да ги задржат постоечките шасии на болидите за претстојните сезони. Доколку должината на трките останеше непроменета, тимовите ќе беа принудени да ги редизајнираат шасиите за да вградат поголеми резервоари за гориво, што претставува исклучително скап потфат.
Скратувањето на должината на трката затоа претставува компромис што им овозможува на тимовите да ги користат постоечките резервоари без огромни дополнителни трошоци за развој. Оваа промена стапува на сила во сезоната 2027. Во пракса, тоа значи дека трките на повеќето патеки ќе бидат пократки за два до три круга.
Единствен исклучок останува култната трка за Големата награда на Монако, која, поради својата уникатна природа, ќе ја задржи пократката должина од 260 километри.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
