Голден Стејт екпресно се рехабилитираше од поразот на домашен терен од ЛА клиперс, па синоќа со доминантна игра го растури истиот ривал во Лос Анџелес со 105-132. Клучно беше првото полувреме во кое „воините“ шутираа со 73% успешност од поле, создавајќи си 19 поени предност што за разлика од претходниот натпревар овојпат го зголемија до конечни „плус 27“. Дурант беше незапирлив и го заврши натпреварот со 38 поени, додека Стеф Кари учествуваше со 21 поен во овој триумф на актуелните шампиони.
Сан Антонио поведе со 2-1 во серијата против Денвер, добивајќи го првиот домашен натпревар со 118-108. Дерик Вајт го одигра својот најдобар плејоф-меч во кариерата постигнувајќи 28 поени за победничкиот тим, додека кај гостите од Денвер српскиот центар Никола Јокиќ реализираше 22 поени, 8 скока и 7 асистенции.
Филаделфија веднаш го врати „брејкот“ на Бруклин, славејќи на првиот гостински натпревар со 115-131. Бен Симонс со 31 поен и девет асистенции го предводеше својот тим до овој триумф, а голем придонес имаше и од Харис, кој го заврши натпреварот со 29 поени и 16 скокови.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
