Роберт Левандовски не сака нов договор со Баерн и веќе му порача на клубот дека е подготвен да си замине. Полскиот репрезентативец има договор до летото 2023 година, па прашање е дали ќе го напушти Минхен како слободен играч или клубот ќе го продаде во следниот преоден рок, а познато е дека Барселона очајно сака да го доведе.
Вообичаено во фудбалските клубови не сакаат да задржат незадоволен играч пред истекот на договорот, но еден од директорите на клубот од Минхен, Оливер Кан, со малку поостар тон го искажа своето мислење на темата и доколку биде прашан, Лева мора да остане.
„Му понудивме нов договор, што тој го одби. Факт е дека Левандовски потпиша валиден договор со нас кој ќе мора да го почитува и тоа е тоа“, изјави Кан.
Левандовски по натпреварот против Волфсбург во саботата потврди дека му кажал на Хасан Салихамиџиќ дека планира да оди и сега чекаме да видиме кој е следниот потег на Баерн. Според сите сметки, клубот на крајот ќе го продаде својот најдобар играч и веројатно најдобар стрелец.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
