Навивачката група „Комити“ се огласи со соопштение во периодот во кој одбројуваат последните денови од рокот што Вардар мора да го испочитува за да се вратат долговите за да може да се дојде до евро-лиценца за настап во европските купови во следната сезона.
Фудбалерите на „црвено-црните“ направија неверојатен подвиг стигнувајќи до убедлива предност пред Шкендија и останатите ривали, но постои сериозна опасност сето тоа да падне во вода и Вардар повторно да не учествува во европските натпреварувања, нешто за што вината ќе мора да се бара единствено кај управата на клубот на чело со Сергеј Самсоненко.
Соопштението на најверните фанови на Вардар го пренесуваме во целост:
„Се огласуваме по повод наближувањето на последниот рок за регулирање на состојбите во ФК Вардар. Состојби кои од една страна можат да значат перспективна иднина со нови можности за Европски настапи и славен крај на сезоната крунисана со титула, тогаш кога сите на почетокот не отпишаа, или пак од друга – враќање на црните денови на неизвесност, тапкајќи во место, затворени во бесперспективност во рамките на нашата скромна лига. Ние покажавме дека сме со клубот во славните денови, кога редиме победи и титули, но и кога бевме на работ на амбисот и можноста за исчезнување (барем времено) од фудбалската мапа…нешто слично што ни прети и денес доколку нештата не тргнат и завршат во вистински правец до крајот на следната недела.
Чесни сме цело време, во свој стил но се трудиме да бидеме додадена вредност во клубот, и на секој начин да помогнеме заедно да бидеме на висините на предизвиците, и повеќе од тоа, но и притоа со нашиот препознатлив темперамент и жестина на трибина на никаков начин не му наштетиме на клубот во кој сме заљубени.
Имаме право да знаеме што се случува во нашиот клуб, но кога ќе прашаме, никој не е доволно компетентен да каже, никој освен едно лице, човекот кој го повикавме самите да влезе во клубот откако покажа дека носи успех и долгорочна стабилност особено во Ракометниот клуб Вардар. И така и беше, до клубот доживеавме да влеземе во групна фаза од официјално Европско натпреварување – Уефа лигата, по славната и неповторлива елиминација на големиот Фенербахче, со победа на жешкиот терен во Истанбул. Со ракометниот клуб доживеавме да подигнеме две Европски Шампионски титули, значи ДВЕ!
Долго имаме моменти на несреденост во Фудбалскиот клуб, и пехови, казни, неможност за играње во Европа, тешко ни падна но не се истрчавме да бидеме критичари плус и капак на ионака лошите ситуации, туку на клубот му подаривме уште повеќе љубов, но и лојалност, бевме и секогаш ќе бидеме спремни да претрпиме удари, доколку е за доброто на клубот. Никогаш нема да го оставиме Вардар без оглед на се ! Па затоа бараме чесност и од човекот од кого зависат нештата, транспарентност од Господинот Сергеј Самсоненко.
До сега нашата верба не беше изневерена, иако се движиме на работ, и иако од таму се демонстрира неизвесност каква не доликува на клуб кој го носи тоа свето име ВАРДАР ! Бараме одговор !
Вардар секогаш бил, е, и ќе биде, но дали мислите дека треба повторно да докажуваме дека тоа е така, со евентуалното овојпат долгорочно унаказување на клубот и повторно неиграње во Европа? Ние велиме не ! Бараме позитивен исход !
Постојат луѓе кои го посакуваат тоа несреќно сценарио, но постои голема Црвено – Црна Армија која очекува да се огласите што поскоро, и со позитивни вести !
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
