Кошаркарот на Мемфис гризлис, Брендон Кларк, почина во мај како последица на комбинираното дејство на хероин и кокаин, соопштија властите во Лос Анџелес. Судскиот вештак на округот утврдил дека смртта на 29-годишниот НБА-кошаркар била случајна. Кларк бил пронајден во бесвесна состојба во спалната соба на куќа во долината Сан Фернандо на 11 мај, а екипата на брзата помош по пристигнувањето можела само да констатира смрт.
Во извештајот се наведува дека значаен фактор било комбинираното дејство на неколку лекови издадени на рецепт, но засега не е прецизирано за кои лекови станува збор. Кларк е роден во Ванкувер, а во НБА пристигна во 2019 година како 21-ви избор на драфтот. Тој беше избран од Оклахома сити, но набрзо беше разменет во Мемфис гризлис, тим за кој ја помина целата своја НБА-кариера.
Проблемите со повредите значително влијаеја врз неговиот последен период на теренот, па така тој одигра само два натпревара во сезоната 2025/26. Вкупно, тој настапи на 309 натпревари во НБА, од кои 50 ги започна како стартер, со просек од 10,2 поени по натпревар. Пред професионалната кариера, играше колеџ-кошарка за Сан Хозе Стејт и Гонзага.
Еден месец пред смртта, Кларк беше уапсен во Арканзас поради неколку прекршоци, вклучувајќи пречекорување на брзината и поседување на контролирана супстанција.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
