По едногодишна пауза предизвикана од пандемијата на коронавирусот, Купот на Македонија кој од оваа година ќе го носи името на кошаркарскиот великан, Благоја Георгиевски Буштур се враќа во етерот. Се е подготвено за три дневен спектакл на „Кале“ каде Пелситер, Работнички, Еуро Никел, МЗТ Скопје, Куманово, Гостивар, ТФТ и Академија ФМП ќе се обидат да го кренат престижниот трофеј, нешто што досега им успевало на осум екипи.
Бранителот на трофејот е Работнички кој во 2019 година го совлада составот на Блокотехна во Гевгелија, трофеј кој за „црвено-белите“ беше десетти во Куп натпреварувањето, а оваа бројка на „Кале“ ќе ја брка и МЗТ Скопје кој заостанува еден трофеј зад вечниот ривал. Покрај овие два тима, во два наврата Купот завршуваше во рацете на Фени Индустри и Гостивар, додека по еднаш за Вардар, Кочани Деликатес, Карпош Соколи и Амак СП.
Денешната богата програма од четвртфиналето започнува од 12 часот со мечот помеѓу Пелситер и Академија ФМП, а истата ќе заврши по „сино-белиот“ натпревар помеѓу МЗТ Скопје и Куманово кој е закажан за 19 часот и 30 минути.
Четвртфиналните двојки се следните:
⋅ Пелистер – Академија ФМП (12:00)
⋅ Работнички – ТФТ (14:30)
⋅ Еуро Никел – Гостивсар (17:00)
⋅ МЗТ Скопје – Куманово (19:30)
Она што го краси Купот е тоа што во него нема фаворити, имате само еден натпревар од 40. минути на кој воопшто нема калкулации и морате да дадете се од себе. Проблемот во ова се јавува и во тоа што за помалку од 24 часа имате и нов дуел, а во овој поглед блага предност има клубот со најдолга клупа.
Тридневниот спектакл на „Кале“ покрај тоа што ќе ги пружи интересни битки ќе ни даде и вовед во она што следи, а тоа е разигрувањето за титула каде овие четири пара повторно ќе ги си одмерат силите. Сите натпревари од Купот „Благоја Георгиевски Буштур“ ќе можете да ги проследите на МРТ3.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
