Фудбалерите на Партизан со предност од еден гол ќе патуваат на реваншот во Норвешка против Молде откако вечерва по голема битка стигнаа до триумф од 2-1. Поради казна од УЕФА „црно-белите“ ја немаа вообичаената поддршка од трибините, каде имаше место само за деца до 14 години.
Молде го искористи тоа и прв дојде до водство пред крајот на првото полувреме, но Партизан израмни преку Сума само две минути подоцна. „Црно-белите“ тргнаа во офанзива во вториот дел, а по промашениот зицер на Асано победничкиот гол го постигна Тошиќ, по одличната асистенција на Урошевиќ.
На останатите натпревари, ПСВ Ајндховен славеше со 3-0 над Аполон Лимасол, додека Селтик триумфираше со 2-0 во Глазгов над шведскиот претставник АИК.
Ланскиот полуфиналист Ајнтрахт загуби на гостувањето против Стразбур со 1-0, а во најинтересниот меч на програмата Вулверхемптон на гостински терен го совлада Торино со 2-3.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
