Џенсон Батон верува дека претседателот на Ферари, Џон Елкан, погрешил што јавно ги критикувал Шарл Леклер и Луис Хамилтон. Место тоа, тој вели дека разговорот зад затворени врати бил единственото правилно решение.
Батон јасно стави до знаење дека Елкан не требало да го изрази своето незадоволство преку медиумите, туку требало директно да им се обрати на своите возачи.
Ферари доживеа целосен колапс во Бразил, по што Елкан им рече на Леклер и Хамилтон дека треба да се „фокусираат на возењето“ и да „зборуваат помалку“.
Овие коментари предизвикаа бура од реакции кај навивачите и аналитичарите, особено затоа што многумина веруваат дека резултатите на Ферари се многу повеќе резултат на недоволно конкурентен автомобил отколку на постапките на возачот.
Ферари повторно се мачи оваа сезона да произведе автомобил способен да се бори за титулата, па затоа Леклер ита кон уште една година без победа. Тоа би била негова втора сезона во последните три години без ниту еден триумф.
Од друга страна, Хамилтон е само во својата прва сезона во Ферари и сè уште чека на својот прв подиум.
Појавувајќи се во нова епизода од подкастот на „Скај Ф1“, Батон објасни зошто верува дека Елкан требало да избере поинаков пристап. Според него, Ферари секогаш носи огромен притисок, и надворешен и внатрешен.
„Ферари отсекогаш имал огромен притисок да биде конкурентен. Секој тим во Формула 1 има притисок, но особено Ферари. Цела Италија сака Ферари да победи“, рече Батон.
Тој истакна дека притисокот не паѓа само врз возачите, туку врз сите во тимот и дека ваквите ситуации мора да се решаваат мудро.
„Но, Џон има само два автомобила во црвената гаража. Едноставно треба само да го пронајде својот возач и да му се приближи и каже: ‘Знаеш што? Тоа не е кул. Тоа не е начинот на кој го правиме тоа. Тоа не е начинот на кој работи овој тим. Ова се упатствата’, или ‘ајде да разговараме зошто го правиш тоа. Зошто чувствуваш потреба да го испратиш ова или она?’“ – рече Батон.
Батон нагласува дека го разбира мотивот на Елкан да го заштити тимот, но верува дека методот не бил соодветен. Тој рече дека најдобриот лек за вакви ситуации е всушност разговор.
„Разбирам, се обидуваш да помогнеш. Но, така отсекогаш било во Ферари. Комуникацијата е најважна во сè, особено во тим каде што илјадници луѓе работат на развој на автомобили, а имаш двајца возачи, двајца од најдобрите во светот. Само оди и разговарај со нив. Тие исто така имаат големо искуство во возење за најдобрите тимови во спортот“, заклучи Батон.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
