Иднината на Родри е сè уште неизвесна, а следните месеци ќе бидат клучни. Освојувачот на Златната топка сè уште не одлучил по кој пат ќе тргне. Тој знае дека на маса ќе има профитабилна понуда од Манчестер Сити за продолжување на договорот за уште две години, до 2029 година, што би го доближило до највисоката плата во тимот, онаа на Ерлинг Халанд, и би го направило најплатениот играч од средниот ред во Европа. Сепак, тој сè уште не донел одлука и не брза, пишува Ас.
Би бил огромен удар за Сити да изгуби некого кој одигра таква улога во најуспешниот период на клубот. Со него, тимот го достигна својот врв со освојување на Лигата на шампионите (токму Родри постигна гол во финалето против Интер во Истанбул), а без него, проектот на Пеп Гвардиола се распадна како кула од карти поради повреда на коленото што го држеше надвор од теренот речиси целата претходна сезона.
Договорот на Родри со Сити влегува во последните две години, односно истекува во летото 2027 година.
Доколку до крајот на оваа година не се постигне продолжување, Сити ќе биде принуден да размисли за продажба по пониска цена за да избегне да го изгуби бесплатно само една година подоцна. Клубот не сака да дојде до таква ситуација под никакви околности. Планот е да се забрзаат преговорите колку што е можно повеќе, но одлуката зависи исклучиво од играчот. Иднината на Родри е отворена, повеќе од кога било, заклучуваат шпанските медиуми.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
