Новиот селектор на женската сениорска репрезентација на Македонија, Милош Гавриловиќ денеска, во хотелот „Континентал“ во Скопје, го имаше првиот собир со репрезентативките во подготовките за Европската лига 2026.
Сите повикани на поширокиот список се појавија на првата прозивка во Скопје и ќе добијат шанса во следните неколку дена да се покажат и докажат пред новиот селектор и неговиот стручен штаб, пред да се направи првиот „пресек“ на списокот.
Девојките меѓу кои и девет дебитантки, насмеани и видно расположени се ставија на располагање на новиот селектор и неговиот стручен штаб, кои на работниот состанок одржан на стартот се претставија и ги изнесоа своите очекувања.
„Ова е за мене нов почеток, со перспективни девојки и мислам дека со заедничка работа, труд и дисциплина, и најважно комуникација може да направиме нешто што долги години го нема во женската одбојка во Македонија. Им благодарам на сите што позитивно одговорија на повикот, им посакувам среќа и се што ќе барам од нив е да дадат се од себе. Искрено би сакал да ги имаме мажите како пример, кои во изминативе неколку години имаат одлични резултати и тие треба да ни претставуваат мотивација, а зошто и да не го надминеме нивниот успех. Нема да биде воопшто лесно, но со работа и дисциплина се надевам дека за одреден период ќе успееме да го направиме тоа. Ги следев девојките и нивните клупски настапи од декември наваму и на прв поглед делуваат сите одлично расположени и како едвај да чекаат да почнат со работа. Денеска ќе имаме еден полесен тренинг за да се запознаеме малку подобро, нема да бидеме комплетни – одбојкарките на Работнички Скопје и Наковски Волеј ќе добијат уште малку простор за одмор, а потоа започнуваме со нормално темпо на работа“, вели новиот селектор на женскиот национален тим на Македонија, Милош Гавриловиќ.
Македонија имаше успешен настап во Европската лига минатата година, но за разлика од тоа издание сега ова натпреварување има нова „тежина“ како дел од циклусот за Европското првенство 2028 година, па така и квалитетот на противниците ќе биде многу посериозен.
„Во ова издание од Европската лига имаме тешки противници, но се познавам себе си и сум амбициозен. Во некои случаи сум и нереален, но верувам во својата работа и работата на мојот стручен штаб. Ќе ни биде потребно време да видиме до каде сме и како сме, по тешката и долга сезона. Репрезентативки од две екипи до пред два дена играа финале на плејоф, колку девојките ќе бидат подготвени на се, не можам да кажам додека не влеземе во сала, но со големи амбиции, може и нереални, влегуваме во Европската лига. Добро е да знаеме до каде сме и да растеме, но не се сомневам дека ќе имаме изненадувања“, констатира Гавриловиќ и продолжува: „Се надевам дека брзо ќе влезат сите во мојот систем на работа и мојата визија за играта. Имаме малку помалку време за адаптација, ќе има силни противници и силни натпревари. Многу работи ќе зависат и од тоа со каков состав ќе дојдат противниците, но повеќе би сакал да мислам на мојата екипа и со каков тим ние ќе настапиме, а девојките кои ќе бидат одбрани за настапот во Европската лига да бидат максимално подготвени.“
Стручниот штаб на Милош Гавриловиќ ќе го сочинуваат Бранка Каленикова (тренер на Газели Волеј) како асистент тренер, Романецот Рареш Стелиан Стоика како кондиционен тренер, Анета Банкова ќе биде нов статистичар, додека лекарскиот тим останува непроменет – доктор на репрезентацијата е Љупчо Петровски, а физио Стефан Јовановски.
Селекторот Гавриловиќ се одлучи за промена на планот, односно наместо мерења, попладнево репрезентацијата да одработи лесен тренинг од кој ќе бидат ослободени одбојкарките на Работнички Скопје и Наковски Волеј, додека од утре се стартува со спроведување на комплетниот работен план.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
