Џенова со фантастичен пресврт стигна дo бод на дуелот против Верона (3-3), со три гола што тимот на нашиот Горан Пандев ги постигна во последните петнаесет минути од натпреварот, за на крајот „веронезите“ да постигнат гол за израмнување во судиското продолжение од овој драматичен дуел.
Македонскиот ветеран влезе во игра на почетокот од второто полувреме при резултат 0-1, а набрзо потоа „веронезите“ поведоа и со 0-2. Се очекуваше рутинско приведување на мечот до крај, но следеше пенал за Џенова што Кришито го претвори во прв гол за домашниот состав.
Потоа на сцена стапи Дестро, кој најпрвин со глава биеше за 2-2, за потоа со извонредна акција по додавањето на Пандев да го комлетира пресвртот, за огромна еуфорија меѓу домашните навивачи на „Мараси“ и новите американски газди на Џенова.
За жал на Пандев и соиграчите, ова не беше и крај на возбудувањата, бидејќи гостите од Верона успеаја да се консолидираат и во 91. минута постигнаа гол за 3-3 и освојување на еден бод, преку хрватскиот напаѓач Калиниќ по центаршутот на Касале.
Пандев се најде во добра ситуација во 95. минута по еден „каранбол“ во гостинскиот шеснаесетник да постигне гол, но голманот на Верона успеа да интервенира и овој драматичен дуел заврши со резултат 3-3.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
