Еден од највлијателните тренери во историјата на НБА и петкратен шампион како играч на Бостон Селтикс, Дон Нелсон почина на 86-годишна возраст. Веста ја потврди неговото семејство во неделата, соопштувајќи дека Нелсон починал мирно, опкружен со своите најблиски.
Нелсон остави длабока трага и како играч и како тренер. Тој помина 14 сезони како кошаркар во НБА, од кои 11 во дресот на Бостон Селтикс. Со легендарниот тим освои пет шампионски титули, а Селтикс го повлекоа од употреба неговиот дрес со број 19 во 1978 година.
Уште поголема трага остави како тренер. Во текот на 31 сезона, ги предводеше Милвоки Бакс, Голден Стејт Вориорс (во два наврати), Њујорк Никс и Далас Маверикс. Ја заврши тренерската кариера со 1335 победи и 1063 порази во регуларниот дел од сезоната, а во моментот на повлекувањето беше тренерот со најмногу победи во историјата на НБА. Неговиот рекорд беше надминат во 2022 година од страна на Грег Попович.
Нелсон трипати беше прогласуван за НБА тренер на годината и тоа во 1983, 1985 и 1992 година. Беше познат по својот исклучително напаѓачки и, за тоа време, неконвенционален пристап кон кошарката.
Неговиот стил, подоцна наречен „Нели-бол“, се засноваше на пониски и поподвижни состави, брзина и создавање на неповолни дуели за противникот. Она што Нелсон го применуваше со децении претходно, подоцна стана еден од темелите на модерната НБА кошарка.
Далас и Голден Стејт заземаат посебно место во неговата кариера. Во Маверикс одигра голема улога во доаѓањето на Дирк Новицки и Стив Неш, додека како тренер на Вориорс го поддржа изборот на Стефен Кари како седми пик на НБА драфтот во 2009 година. По смртта на Нелсон, Кари изјави дека тој бил една од главните причини поради кои Голден Стејт го избрал.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
