Најголема боксерска приредба во Македонија, традиционалниот „Златен гонг“, кој годинава слави убав јубилеј, 50 години од одржувањето на првиот турнир ќе се одржи на 12. и 13. ноември во малата сала на „Борис Трајковски“. На 12. ноември се закажани полуфиналните борби, а финалните се на 13. ноември.
Досега федерациите на Англија, Велс, Р. Ирска, Србија, Босна и Херцеговина, Косово, Италија, Црна Гора, Украина и Бугарија ги пријавија своите боксери за настап на „Златниот гонг“.
Рок за пријавување е 31. октомври и се очекуваат уште пријави од Словенија, Албанија и Турција кои усно ги најавија своите боксери. Може да се случи на „Златниот гонг“ за првпат да настапат и боксери од Хонг Конг и Шри Ланка, кои покажаа интерес за турнирот, како и федерацијата на Молдавија.
Одредени се и боксери од Македонија кои ќе настапат на турнирот. Тоа се: Адријан Џемили, Оран Шакировски, Јасим Љама, Лион Лена, Алим Насуфи, Лео Јовановски и Арсим Етеми. Ќе ги водат тренерите Ружди Калач и Петре Чурлиновски.
„Златниот гонг“ се одржува под покровителството на Град Скопје, Агенцијата за млади и спорт и Боксерската федерација на Македонија.
М.М.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
