Работнички за првпат оваа сезона успеа да врзе три победи во рамките од Првата лига, откако „центарци“ славеа во денешната пресметка со Куманово со резултат 79-72. Ова е вкупно петти триумф во низа за „црвено-белите“ ако се земе во предвид и завршницата од АБА2-лигата, предзнак дека Работнички се буди токму во пресрет на клучниот дел од оваа натпреварувачка сезона. За Куманово ова беше прекин на серијата од три победи, но „сино-белите“ се на добар пат да обезбедат место во плејофот, со оглед на фактот дека во досегашните 16 одиграни средби имаат скор од 10-6.
Кумановци фуриозно го почнаа мечот поведувајќи со 0-13, пред Младеновски на истекот на четвртата минута да ги постигне првите поени за Работнички на натпреварот. „Центарци“ успеаја да се вратат и ја завршија првата четвртина со минимална негатива од 20-22, по што во вторите 10 минути можеше да се проследи израмнета игра на двете страни. Куманово замина на одмор со минимално водство од 37-39, а куриозитет е што само тројца кошаркари од тимот на Работнички во првото полувреме се запишаа меѓу стрелците (Питс, Младеновски и Бундовиќ).
Дуелот беше израмнет се до почетокот од последната четвртина, кога проработе нападот на Работнички, Младеновиќ и Мулалиќ погодија тројки, Питс го продолжи „шоуто“ со поени под прекршок, па предноста експресно порасна на 64-55. Кумановци предводени од Ѓекиќ се приближија, но Ефремовски погоди тројка во клучен момент за Работнички, по што скопскиот клуб не дозволи триумфот да му биде доведен во прашање и на крајот славеше со 79-72.
Американскиот плејмејкер Питс одигра одличен меч со 32 поени и пет асистенции, а во извонредно светло се прикажа и Младеновски, остварувајќи дабл-дабл од 18 поени и 14 скокови. Ѓекиќ со 25 и Ливингстон со 23 поени беа најефикасни во редовите на Куманово.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
