Работнички влегува во нива победничка низа откако во заостнатиот натпревар од 15. коло славеше на гостувањето во Струга против Црн Дрим со 78-85. Домаќините одиграа нов одличен натпревар во кој успеаја да го добијат фаворитот во скок играта (35-30) и играта во рекетот (46-32), но потфрлија во последната четвртина во која искусниот тим од главниот град ги корсистеше грешките на стружани, одигра добро во одбраната и ја забележа 14. победа во сезоната.
Неизвесниот натпревар двата тима го наговестија од самиот старт. Првата четвртина заврши во егал (19-19), а играта „кош за кош“ во кој ниеден тим не успеа да направи позначајна разлика продолжи и до крајот на првото полувреме кое им припадна на гостите благодарение на серијата од 6-0 во последните две минути (41-43). Избраницие на Чочороски одиграа добро во одбраната на отварањето на вториот дел од натпревар во кој дозволија само 13 поени на нашиот најтрофеен кошаркарски колектив, а постигна 21 со што ја превземаа иницијативата пред одлучуваките десет минути (62-56). Тешко стекнатата предност на Црн Дрим не траеше долго бидејќи до 33. минута од мечот Работнички преку Мулалиќ, Питс и Бундовиќ направи серија од 12-2 со што стигна до +4 (66-70), а моментумот на „црвено-белите“ продолжи до самиот крај што беше доволно за нова победа.
Соколовиќ и Пантиќ беа предводниците на Црн Дрим со по 16 поени, дабл-дабл од 14 поени и 15 скока забележа Жао Марсело, додека како двоцифрен со 13 поени натпреварот го заврши Коскоски. Питс беше првото име кај Работнички со 25 поени и 4 асистнеции, Иван Аска додаде 19 поени и 9 скока, додека Бундовиќ натпреварот го заврши со 17 поени и 5 скока.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА