Жозе Мурињо се најде во големи проблеми пред почетокот на Лигата на шампионите. Во вторник, Реал Мадрид го пречекува Интер на „Сантијаго Бернабеу“, а португалскиот тренер практично ќе биде без целиот среден ред за еден од најтешките натпревари на почетокот на новата сезона.
Арда Гулер, Едуардо Камавинга и Бернардо Силва нема да имаат дозвола да играат поради суспензиите што ги презедоа од минатата сезона во Лигата на шампионите. Сите тројца беа исклучени во своите последни натпревари во натпреварувањето минатата сезона, а казните за црвени картони се пренесуваат и во новата европска сезона.
Повредата на Чуамени ги зголемува проблемите. Францускиот репрезентативец сè уште не е подготвен, а Мурињо призна дека не знае дали ќе биде подготвен за Интер.
„Не знам дали Чуамени воопшто ќе биде подготвен за Интер. Ќе имаме проблем во средниот ред поради суспензиите на Гулер, Бернардо Силва и Камавинга. Практично, Валверде ќе биде единствениот играч од првиот тим што ни е достапен. Имаме голем проблем што мора да го решиме“, рече Мурињо.
Валверде практично остана сам
Шпански АС пишува дека Федерико Валверде во моментов е единствениот природен играч од средниот ред од првиот тим на кој Мурињо сигурно може да смета. Затоа Португалецот ќе мора да импровизира.
Една опција е да се премести Џуд Белингам подлабоко во средниот ред, иако Мурињо претпочита да го користи поблиску до противничкиот гол. Трент Александар-Арнолд, кого Португалецот веќе го користеше на средината на теренот, и стоперот Дин Хујсен се споменуваат како опции. Младиот Хорхе Честеро исто така би можел да добие можност.
Тука е и 19-годишниот Серхио Мартинез, кого Мурињо го додаде во првиот тим во последните денови токму поради проблемот со бројот на достапни играчи од средниот ред. Младиот Шпанец беше во составот и за првенствениот натпревар против Бетис.
Интер доаѓа по првиот пораз на Реал
Проблемите доаѓаат во незгоден момент за Реал. Во петокот, тимот на Мурињо го претрпе првиот пораз во новата сезона, губејќи со 1-0 од Бетис, а Килијан Мбапе промаши пенал во судиското продолжение што можеше да донесе бод.
Сега доаѓа враќањето на Интер и Мурињо за да се сретнат со клубот каде што постигна еден од најголемите успеси во својата кариера. Португалецот ја освои Серија А, Купот на Италија и Лигата на шампионите со Интер во 2010 година, кога во тимот беше и македонската легенда Горан Пандев, и ја постигна историската тројна круна.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
