Европскиот клупски првак Реал Мадрид ги следи настапите на Сандро Рамирез, на Европското првенство за селекции до 21 година што се одржува во Полска, открива „Марка“. Тој е поранешен фудбалер на Барселона, кој изминатиот период го носеше дресот на Малага, и минатата сезона постигна 14 гола на 28 натпревари во Примера. Сандро е блиску до потпис со премиерлигашот Евертон, но „кралскиот клуб“ би можел да се вмеша во трката за овој напаѓач во последен момент.
Покрај Сандро, скаутите на Реал Мадрид ги следат и голманот на шпанската репрезентација, Кепа Аризабалага, играчот за врска Маркос Љоренте и Дани Себалос од Бетис. Секако, од поодамна е познато дека „кралевите“ се заинтересирани и за Џанлуиџи Донарума, голманот на италијанскиот национален тим.
Во минатото, по настапите на ЕП до 21 година, Реал Мадрид ги купуваше Ројстон Дренте во 2007 година, Месут Озил и Сами Кедира во 2009 година, и Асиер Илјараменди и Иско во 2013 година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
