Македонскиот мотоциклист Христијан Бузалковски со два подиуми на „Словакиаринг“ го продолжи успешниот настап во ФИМ Европскиот шампионат и пред завршната трка во Бугарија останува во директна борба за вицешампионската титула.
Министерот за спорт, Борко Ристовски, оствари средба со Бузалковски, кој изминатиот викенд го освои второто и третото место на двете трки во класата СуперСток 1000 на легендарната патека „Словакиаринг“ во Словачка.
Со освоените бодови, Бузалковски моментно е трет во генералниот пласман, со само два бода заостанување зад второпласираниот натпреварувач, што ја прави завршната трка од шампионатот директна пресметка за европската вицешампионска позиција.
Ристовски му честиташе на Бузалковски за двата подиуми и истакна дека неговите резултати го потврдуваат потенцијалот на македонскиот мотоспорт и покажуваат дека македонските спортисти можат рамноправно да се натпреваруваат за највисоките позиции на европската сцена.
На средбата беше разговарано и за подготовките за завршната трка во Бугарија, на која Бузалковски ќе ја има можноста успешната сезона да ја заокружи со освојување на вицешампионската титула во ФИМ Европскиот шампионат.
Министерството за спорт ќе продолжи да ги поддржува македонските спортисти кои со резултати, професионален однос и континуирана работа успешно ја претставуваат Македонија на меѓународната спортска сцена.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
