Цибона, клуб кој со децении беше симбол на европската кошарка и гордост на Загреб, со години се бореше со долгови, блокади и егзистенцијални проблеми.
Не е претерување да се каже дека во неколку наврати беше на работ на затворање, но сега се појави зрак надеж.
Во преден план е Виктор Додиг, канадски бизнисмен со хрватски корени, кој наскоро треба да стане мнозински сопственик на клубот. Неговото доаѓање веќе се опишува како почеток на нова ера.
Додиг е човек кој со децении градеше кариера на самиот врв на северноамериканскиот бизнис, управувајќи со милијарди и водејќи некои од најголемите корпорации во Канада.
Сепак, тој одлучи да влезе во проект кој нема класична бизнис логика, а тоа е спасувањето на Цибона.
„Верувам во овој бренд и во оваа приказна. Цибона долго време беше на интензивна нега, сега е на рехабилитација, а потоа може да се бори за медали. Ова е можност за нејзин нов живот“, вели Додиг.
Неговата финансиска сила веќе се чувствува. Според достапните информации, повеќе од половина милион евра веќе се инјектирани во клубот со цел да се стабилизираат основните обврски, додека паралелно се работи на трансформација на Цибона во спортско акционерско друштво.
Планот е јасен, пристигнува свеж капитал, стабилно управување и враќање на европската мапа.
Додиг, заедно со своите партнери, треба да инвестира неколку милиони евра, а се очекува да го преземе и мнозинскиот удел во сопственичката структура на клубот.
Но, она што ја прави оваа приказна посебна е неговата мотивација.
„Ова не е финансиска програма, ова е емотивна програма. Не барам ништо за себе. Сакам Цибона да се врати таму каде што беше“, рече Додиг.
Виктор Додиг е роден во Торонто во 1965 година во семејство на емигранти од Херцеговина.
Иако целиот свој живот го поминал во Канада, никогаш не ја изгубил врската со своите корени, и токму оваа врска сега игра клучна улога во неговата одлука.
Неговиот образовен и деловен пат е импресивен. Дипломирал на Универзитетот во Торонто, студирал во Париз и го завршил својот МБА на престижниот Харвард како еден од најдобрите студенти на својата генерација.
Својата кариера ја изградил преку гиганти како што се Мекинзи, Мерил Линч и УБС, а е најпознат по тоа што ја водеше CIBC Bank, една од најголемите финансиски институции во Канада.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
