Шкендија го комплетираше техничкиот штаб на првиот тим, откако Агрон Мемеди и Дијамант Кадриоли се приклучија на стручниот тим предводен од главниот тренер Артим Положани.
Мемеди и Кадриоли ќе бидат дел од стручниот штаб во кој веќе се наоѓаат Куштрим Вока и фитнес тренерот Саимир Фетаи, со што клубот го заокружи тимот кој ќе работи со првиот состав во продолжението од сезоната.
Комплетирањето на техничкиот персонал доаѓа по враќањето на Беким Османи во фудбалската школа на Шкендија, додека досегашниот тренер на голманите Саладин Мустафи го продолжува професионалниот ангажман во странство.
По консултации со главниот тренер Артим Положани, клубот се одлучи за ангажман на двајца искусни профили, кои треба да дадат свој придонес во работата со првиот тим.
Агрон Мемеди е добро познато име за тетовскиот клуб. Станува збор за поранешен фудбалер на Шкендија и поранешен соиграч на Положани, кој во минатото беше дел и од академијата на клубот. Сега Мемеди добива нова улога во Шкендија и ќе биде дел од техничкиот штаб на првиот тим.
Од друга страна, Дијамант Кадриоли пристигнува од Косово. Поранешниот голман веќе има искуство во тренерската работа, особено во развојот и подготовката на голманите, откако претходно бил ангажиран во неколку клубови.
Со нивното пристигнување, Шкендија добива дополнително искуство во стручниот штаб, а Положани ќе има на располагање комплетиран тим на соработници за секојдневната работа со фудбалерите.
Тетовскиот клуб продолжува со подготовките и организацијата на тимот, со амбиција новиот стручен штаб да придонесе за остварување на целите на Шкендија во актуелната сезона.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
