Пред Светското првенство, Винисиус Жуниор сè уште е во активни преговори за нов договор со Реал Мадрид. Иако со години е едно од заштитните лица на Реал Мадрид, преговорите околу неговиот нов договор се претвораат во сериозен проблем за кралскиот клуб.
Според последните информации, Реал Мадрид и бразилската ѕвезда не успеаја да постигнат конечен договор за продолжување на соработката дури и по речиси две години разговори.
Ситуацијата стана особено чувствителна бидејќи Винисиус влегува во период кога клубот мора да донесе клучна одлука – или ќе ги прифатат неговите финансиски барања или ризикуваат да го изгубат еден од најважните играчи.
Наводно, Реал Мадрид му понудил на Бразилецот нов петгодишен договор вреден околу 20 милиони евра нето по сезона со бонуси. Сепак, ова очигледно не е доволно за да се заврши целата приказна.
Шпанскиот новинар Мигел Серано тврди дека Винисиус нема намера да предизвикува проблеми за клубот и дека не сака еден ден да замине како слободен агент без обештетување.
Тоа беше позитивно прифатено во Мадрид бидејќи Бразилецот, и покрај комплицираните преговори, сè уште покажува почит кон клубот и претседателот Флорентино Перез.
Се вели дека Винисиус постојано нагласувал колку ја цени поддршката што ја имал од Перез во најтешките моменти од неговата кариера во Мадрид, особено во периодите кога бил цел на критики и расистички испади низ цела Шпанија.
Сепак, проблемот за Реал Мадрид е многу подлабок од желбата на играчот да остане. Кралскиот клуб е во еден вид стапица.
Доколку Винисиус добие драстично зголемување на платата, тоа би можело целосно да ја наруши постојната структура на платите во соблекувалната и да отвори врата за нови огромни барања од други ѕвезди како Џуд Белингам, Килијан Мбапе или идни засилувања.
Од друга страна, доколку преговорите продолжат да стагнираат, Реал ризикува да создаде огромна неизвесност околу иднината на еден од своите клучни играчи. Во Мадрид се свесни дека Винисиус повеќе не е само важен фудбалер, туку и глобален маркетиншки симбол на клубот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
