Рајо Валјекано со гол во финишот обезбеди триумф над Елче на домашен терен во рамки на последниот натпревар од 7-то коло во шпанската Ла Лига (2-1).
Натпреварот го отворија гостите, откако Лукас Боје во 32. минута најдобро се снајде во шеснаесетникот на нашиот Столе Димитриески, успевајќи да го совлада за водство од 0-1. До крајот на полувремето домаќините постојано притискаа, а таквиот пристап кон играта им се исплати во 40. минута, кога Серхио Камело изедначи на 1-1, резултат со кој се отиде на пауза.
Во вториот дел Рајо ја презеде во целост контролата на натпреварот, постојано креираа акции и шанси за гол, но без реализација. Тимот од Мадрид успеа да го скрши отпорот на последно пласираниот Елче дури во последните секунди од мечот, кога Унаи Лопез во 90+6. минута постигна перфектен гол за ерупција на трибините и нови три бода на контото во Ла Лига.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
