Во првиот натпревар пред својата публика во новата сезона во Лигата на шампионите, ракометарите на Вардар денеска (17.30 ч.) во СЦ „Јане Сандански“ го пречекува шведскиот Кристијанштад. Статистиката и традицијата се на страната на македонскиот шампион кој во овој дуел влегува со улога на фаворит, но и со задолжителна доза на претпазливост и на концентрација без потценување на противникот.
„Овој меч е многу важен за нас. Фокусирани сме на натпреварот и очекувам во сите 60 минути да одиграме на исто ниво и да дојдеме до нови бодови. Вуко Борозан не играше на дуелот од СЕХА, но сега се работи за натпревар од ЛШ и Вуко ќе биде во составот“ –најави тренерот на Вардар, Роберто Парондо.
Вардарци имаа победнички старт во ЛШ на гостувањето кај Монпелје (24-27), а Кристијанштад загуби дома од Мешков Брест (30-32).
Во меѓусебните дуели со шведскиот првак, Вардар е неприкосновен со шест победи во сите шест натпревари, вклучувајќи ги и рекордните 31-15 на ланскиот дуел во групната фаза. Интересен е податокот дека Вардар и Кристијанштад веќе трета сезона по ред играат во иста група во ЛШ. А, статистиката покажува и дека „црвено-црните“ секогаш максимално подготвено стартуваат во ЛШ и во последните четири сезони имаат по најмалку три победи по ред.
Кристијанштад може да биде незгоден противник, на домашен терен, но на гостувањата Швеѓаните и не се така убедливи со само три победи во 22 гостински натпревари во Лигата на шампионите.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
