Вардар се откажа од уште еден свој младински репрезентативец. По заминувањето во зимскиот преоден рок на клучниот помлад потенцијал во клубот, предводен од репрезентативците Бобан Николов и Висар Муслиу, Вардар го раскина договорот и со членот на репрезентацијата до 19 години на Македонија и долгогодишен капитен на младинскиот тим – Есмин Личина.
19-годишниот Личина, кој изминатава полусезона настапуваше како позајмен фудбалер во редовите на ФК Скопје, сега и дефинитивно го раскина професионалниот договор со „вардарци“ и официјално преселувајќи се во редовите на тимот од Автокоманда.
Личина, кој е дете на Вардар, беше капитен на шампионската генерација на најтрофејниот македонски клуб која го освои младинскиот шампионат и го имаше првото историско учество на еден наш тим во младинската Лига на шампиони. Една година во континуитет беше дел и од сениорскиот состав но сега „црвено-црните“ се одлучија да се откажат од неговите услуги.
Во овој зимски преоден рок, Вардар го напуштија покрај Николов (Видеотон, Унгарија) и Муслиу (Шкендија) уште двајца репрезентативци од младата селекција која не однесе на ЕП 2017 во Полска, Бесир Демири (Мариупол, Украина) и Петар Петковски (Работнички), а веќе е најавен трансферот од јуни и на 23-годишниот Дарко Велковски во хрватскиот шампион Ријека.
Како што е познато, пред само четири месеци во септември 2017, Вардар се откажа од уште еден свој талент, Ердон Даци, исто така член на шампионската младинска генерација, кој сега е еден од најдобрите фудбалери во младинската академија на турскиот прволигаш Коњаспор.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА