Актуелниот шампион Вардар доживеа голем удар минатиот викенд, откако го загуби дербито против Шкендија на Арената „Тодор Проески“. Овој пораз, зачинет и со претходните порази на европските натпревари на домашен терен, го чинеше отказ шефот на стручниот штаб Кристијан Фабијани.
Аргентинскиот стратег си замина, а тимот на натпреварот со Струга Трим Лум ќе го предводи сега неговиот асистент Матија Мирков, затоа што клубот досега не именуваше нов тренер. Мирков беше соработник и на Гоце Седлоски во ланската шампионска сезона.
Како и да е, се очекуваат измени и во составот, а Матија Мирков ќе треба да ги пронајде единаесетмината кои ќе „кликнат“ и ќе одиграат квалитетен натпревар со амбиција да ги освојат трите бода.
Ако нешто на Вардар му оди во прилог оваа сезона, тоа дефинитивно се натпреварите на гости. Во Европа покажа дека многу подобро може да одигра надвор од дома и да победи, отколку на Арената „Тодор Проески“. Останува да се види како тренерската промена сега ќе се одрази на настапот на вардарци против Струга Трим Лум.
Натпреварот меѓу Струга Трим Лум и Вардар е закажан за 16.:30 часот, а ќе го суди Доне Ристовски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
