Со денешниот дуел меѓу Словенија и Украина (11.30 часот) и официјално ќе биде означен стартот на нокаут фазата од Евробаскет 2017. Идентично како и пред две години, откако групната фаза се одржа во четири различни земји, битката за трофејот ќе се води само во една држава – Турција, па денеска и утре 16-те најдобри европски селекции во Истанбул ќе ги одиграат своите осминафинални пресметки.
Барем на хартија најлесна задача би требало да имаат кошаркарите на Словенија. Предводени од Драгиќ и од Дончиќ Словенците играат извонредна кошарка и со максимални пет победи ја завршија групната фаза, додека на спротивната страна Украина е далеку од нивното ниво, a до осминафиналето стигна со победата во последното коло над Израел, меч што немаше никакво значење за ко-домаќините на шампионатот.
Дербито на осминафиналето ќе се игра вечерва во 20.30 часот, а силите ќе ги одмерат поранешните шампиони Литванија и Грција. Составот на Грција играше далеку под своите можности во групната фаза, па пласманот во Топ 16 го избори дури во последното коло со победата над Полска. Сепак, јасно е дека со Вурусис, Калатес, Слукас, Принтезис… Грците имаат доволно оружје за да го совладаат секој ривал, а на Литванците нема да им биде нималку лесно да стигнат до четвртфиналето.
Финска, која беше најпријатно изненадување во групната фаза, ќе се обиде и надвор од својата земја да ги продолжи добрите игри, на дуел со Италија. Интересно се очекува да биде и на пресметката меѓу Германија и Франција, особено ако се земат во предвид огромните осцилации во играта на „триколорите“ во текот на целиот шампионат.
ДВОЈКИ ЗА ОСМИНАФИНАЛЕ
Сабота
Словенија – Украина 11.30ч
Германија – Франција 14.15ч
Финска – Италија 17.45ч
Литванија – Грција 20.30ч
Недела
Латвија – Црна Гора 11.30ч
Србија – Унгарија 14.15ч
Шпанија – Турција 17.45ч
Хрватска – Русија 20.30ч
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
