Годината што изминува не беше премногу успешна кога станува збор за индивидуалните бројки на нашите фудбалски репрезентативци, откако само мал дел од нив беа стандардни во своите клубови и во топ-ритам ги дочекуваа натпреварите на националниот. Според она што е јасно во моментов, 2024 ќе биде година на трансфери на нашите интернационалци, кои се во потрага по тимови каде ќе имаат позначајни улоги.
Елиф Елмас е првиот што повлече нога „дијамантот“ пред седум месеци освои скудето со Наполи, но малата минутажа што ја имаше кај Гарсија, а потоа и кај Мацари го примора Елиф за нов предизвик во кариерата. Бундес-лигата е негова следна дестинација, откако Елмас уште пред неколку дена го комплетираше трансферот во редовите на Лајпциг.
Кој ќе го следи Елмас со нов клуб во 2024 година, конкуренцијата е навистина силна. Најавите од Турција велат дека Енис Барди исто така е блиску до Бундес-лигата, откако Трабзон почнал преговори за да го продаде нашиот капитен во Унион Берлин.
Дарко Чурлинов дефинитивно ќе си замине од Барнли во јануари, негова желба е Шалке, но финансиските проблеми на „сино-белите“ го компликуваат овој трансфер. Многу е веројатно дека Чурлинов ќе се врати назад во Германија, каде Сент Паули и Фортуна Дизелдорф се во трка за неговиот потпис.
Бојан Миовски има извонредна сезона во дресот на Абердин, што е причина Македонецот повторно да е актуелен на фудбалската берза. Селтик покажува сериозен интерес, исто како и клубови од англискиот Чемпионшип, но засега проблем е отштетата од шест милиони фунти на која инсистира Абердин.
Во 2024 година трансфер ќе направи и првиот голман на репрезентацијата, Столе Димитриевски. Тој е стандарден во Рајо Валјекано, но договорот му истекува на крајот на сезонава, а Димитриевски има неколку одлични понуди на маса и веќе е извесно дека ќе го напушти мадридскиот прволигаш. Валенсија и Вилјареал се клубовите кои во моментов се најзагреани за потписот на Македонецот.
Време е за трансфер и на Дарко Велковски, кој е без клуб откако на стартот од сезонава се раздели од Ал Етифак, додека од друга страна Џани Алиоски најави дека е подготвен да остане во Ал Ахли иако клубот од Саудиска Арабија воопшто не го регистрираше поради преголемиот број на странци во екипата.
Нови клубови се очекува да добијат и репрезентативниот напаѓач Милан Ристовски, кој заминува од Спартак Трнава, како и Стефан Ашковски и Дамјан Шишковски кои се пред трансфер во Динамо Батуми односно ерменски Арарат.
Левокрилниот дефанзивец Езгијан Алиоски, и покрај претходните најави за нов клуб, се очекува да остане во Саудиска Арабија и престојнава година.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
