Македонскиот репрезентативец Јован Манев обезбеди место во 3.коло од квалификациите за УЕФА Конференциската лига откако со Адана Демирспор славеше со 2-1 на реванш дуелот против романски Клуж.
Адана до неопходната победа, по она реми (1-1) во Романија од првиот меч, дојде со голот на Ндиаје во 94. минута од средбата.
Манев во игра на натпреварот влезе во 69. минута при резултат 1-1, откако Адана поведе со голот на Акинтола во 43. минута, но гостите израмнија во 68. минута од пенал.
GOOOLLL | Adana Demirspor 2-1 Cluj, 90+3' Cherif Ndiaye pic.twitter.com/K7RABoCHgy
— GOLKOLİK (@golkoliktv) August 3, 2023
И Милан Ристовски ќе игра во 3. коло од Конференциската лига со Спартак Трнава откако на реваншот на домашен терен неговата екипа славеше со 4-1, па со вкупен резултат 5-2 ја елминираше летонската Ауда. Ристовски остана само на клупата за резервни играчи на денешниот натпревар.
Романски Сепси триумфираше убедливо со 4-0 против ЦСКА Софија и со убедливи 6-0 ги елиминираше Бугарите од натамошните натпревари. За Сепси целиот натпревар го одигра Исник Алими, поранешниот фудбалер на Охрид, кој беше стрелец од пенал и на четвртиот гол за романската екипа.
Елиминација од европската сцена доживеа поранешниот македонски младински репрезентативец Даниел Миловановиќ со унгарски Залаегерцег. Унгарците загубија со 1-2 од хрватскиот Осијек на денешниот дуел на домашен терен и со вкупен резултат од 1-3 ги завршија европските настапи. Миловановиќ ги одигра последните десет минути на денешниот дуел за својот тим.
И Филип Најдовски со албанска Тирана се елиминирани од Европа по новиот пораз од турски Бешикташ. Турците победија со 3-1 на првиот меч во Истанбул, а сега триумфираа со 0-2 и на гостувањето во Тирана. Најдовски, со капитенската лента, го одигра целиот меч за домашната екипа.
Андреј Стојчевски и словачка Жилина доживеаја и втор убедлив пораз од белгиски Гент, овој пат со 2-5 на домашен терен, по оние 5-1 од првиот меч во Белгија. Стојчевски не доби шанса за настап на денешниот натпревар, останувајќи на клупата за резервни фудбалери.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
