Грчкиот фудбалер Јанис Константелијас ја продолжува својата кариера во Борусија Дортмунд. Неговиот трансфер од солунскиот ПАОК беше договорен, што предизвика бурна реакција од навивачите кои се обидоа да го спречат.
Откако неуспешно се обидоа да го контактираат претседателот на клубот Иван Савидис, тие се одлучиле за порадикален потег.
Константелијас отпатува во Дортмунд на медицински преглед, но таму го пречека изненадување. Група навивачи на ПАОК го следеа до Германија и го пресретнаа на аеродромот. Го принудија да воспостави видео повик со водачите на навивачката група во Грција за да ја објасни својата одлука да замине. Навивачите се особено огорчени затоа што претходно им ветил дека нема да го напушти клубот.
Обидот за блокирање, овој пат, не успеа
Слична ситуација се случи и минатата година. Константелијас потоа имаше договорен трансфер во Штутгарт, но навивачите се спротивставија. Во Солун се појави хаос, а по притисокот на навивачите врз претседателот и раководството на клубот, трансферот на крајот беше запрен. Овој пат работата беше извршена попретпазливо, но навивачите сепак успеаја да го пронајдат во Дортмунд и да побараат објаснување за неговото заминување.
Јанис Константелијас е производ на фудбалската школа на ПАОК. Тој се врати во својот матичен клуб во 2022 година по краток престој во белгискиот Еупен. Одигра вкупно 190 натпревари за црно-белите, постигна 44 гола и запиша 26 асистенции. Трансферот на овој 23-годишник ќе му донесе на грчкиот клуб приход меѓу 25 и 30 милиони евра.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
