Челниците на ФФМ го минаа периодот на самоизолација – без симптоми за коронавирус

Претседателот на Фудбалската федерација на Македонија, Муамед Сејдини и потпретседателот на федерацијата, Лазар Ракиџиев без никакви симптоми на постоење коронавирус го минаа периодот од 14 денови по присуството на Конгресот на УЕФА во Амдстердам (03. – 17. март), информираат од ФФМ. Првите луѓе на македонскиот фудбал по препорака од Институтот за Јавно здравје минаа неколку дена во изолација откако беше потврдено дека претседателот на Фудбалскиот сојуз на Србија и неговиот заменик, кои исто така беа дел од Конгресот на УЕФА, се позитивни на коронавирусот SARS-CoV-2.

Без симптоми на коронавирусот по враќањето од Амстердам се и селекторот на македонската А репрезентација, Игор Ангеловски и портпаролот, Златко Андоновски. Двајцата, по официјалната посета на тренинг центрите и сместувачките капацитети за ЕВРО 2020 во Холандија, пристигнаа во Скопје, ден подоцна од водечките луѓе на ФФМ.

Истовремено, Фудбалската федерација на Македонија преку генералниот секретар, Филип Поповски го информира целото фудбалско семејство дека „Куќата на фудбалот“ до 24. март 2020 година, односно до денот кога истекува предвидениот рок од македонската Влада за овозможување на право за отсуство од работа заради превенција од коронавирусот SARS-CoV-2, ќе работи ограничено во однос на човечките ресурси присутни во Фудбалската федерација на Македонија, односно само во исклучително потребни случаи, администрацијата на ФФМ ќе биде на работните места во федерацијата.

За да се намали фреквенцијата, особено за документите и барањата кои најчесто им се потребни на клубовите од сите категории, овозможивме најчесто бараните документи, или други потреби да се добиваат по електронски пат.

„Имајќи ги в предвид препораките и забраните од надлежните институции за превенција од коронавирусот, оваа одлука е разумна. Се случува досега нешто невидено во фудбалот и спортот воопшто. Мораме да бидеме загрижени за здравјето на сите кои се поврзани со нашата организација. Ова е вонредна ситуација и мораме да се носиме со тоа. ФФМ кон овој проблем постапува максимално одговорно. Животот на луѓето мора на сите нас да им биде на прво место“, изјави генералниот секретар, Филип Поповски.

Се вчитува...