Селекторот на шпанската фудбалска репрезентација, Луис де ла Фуенте, пред финалето на Светското првенство против Аргентина изјави дека неговиот тим мора да остане верен на својот стил на игра бидејќи тоа е она што ќе ги доближи до освојувањето на титулата.
Предводникот на „Фуријата“ рече дека е смирен пред финалето, и уверен ако го играат својот стил на игра, ќе бидат поблиску до остварување на целта.
„Многу сум смирен и уверен дека, ако останеме верни на идејата што нè донесе тука, ќе бидеме поблиску до остварување на нашата цел. Имаме голем фудбалски потенцијал. Не би се чувствувале удобно во дискусии или провокации. Знаеме како да играме фудбал, да ѝ дадеме смисла на нашата игра кога ја имаме топката, а кога ја немаме, да бидеме дисциплинирани, агресивни и брзо да ја вратиме“, рече Де ла Фуенте.
Шпанскиот тренер истакна дека една од најголемите предности на тимот е меѓусебната доверба и долгогодишното познавање на играчите, од кои многумина ги менаџирал уште од јуниорските репрезентации. Тој додаде дека тоа е она што ја прави разликата и дека атмосферата во тимот е одлична.
„Задоволни сме од она што го постигнавме, но сакаме да направиме уште еден чекор и да го освоиме Светското првенство. Секој тим ќе ги искористи своите силни страни. Судијата е тој што мора да ги применува правилата и да не дозволува ситуации што ја преминуваат линијата“, нагласи шпанскиот селектор.
Натпреварот за титулата ќе се игра во недела, со почеток во 21 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
