Еден од најдобрите фудбалери на светот Лионел Меси одлучи да остане во Барселона, тимот за кого даде се во последните скоро 20 години и покрај тоа што не е во најдобар однос со раководството на клубот предводено од претседателот Бартомеу. Многумина зборат за интервјуто на Аргентинецот во кое конечно прозборе за сите проблеми во клубот. Медиумите ширум светот ги потенцираа десетте цитати на Меси кои открија многу работи.
„Цела сезона им зборував на раководството и претседателот дека сакам да заминам“, со изјавата Меси покажува дека уште на стартот на годината било разговарано за негово заминување, нешто што очигледно добро се криеше во Каталонија.
Тука се надоврзува и изјавата на Меси во која вели дека Бартомеу не се држел до џентлменскиот збор кој го дал.
„Претседателот секогаш говореше дека јас за мојата иднина можам да одлучувам на крајот на секоја сезона. На крајот тоа не испадна така“, вели Меси.
Тој во интервјуто откри дека секоја година имал понуди од европските гиганти каде можел да заработи многу повеќе, но дека Барселона е неговиот дом кој не сака да го напушти.
„Секоја година можев да заминам и да заработам повеќе него во Барселона, но секогаш велев дека ова е мојот дома и не сакам да заминам“, дополни Меси.
Исто така тој е разочаран што немало никаков план во клубот и се купувало само колку да се пополнат дупките и покрај тоа што три години по ред доживуваа срам во Лигата на шампионите.
„Вистината е дека нема проект во Барселона, туку само пополнување на дупки“, рече Меси.
„Три години по ред ни се случува истото во Лига на шампиони. Прво беше Рома, потоа Ливерпул, а на крај катастрофата од Баерн во Лисабон“, заврши Меси.
За жал како што вели останува во клубот само поради големата клаузула од 700 милиони евра и тоа дека не сака да оди на суд со омилениот клуб.
„Продолжувам со Барселона само поради големата клаузула од 700 милиони евра“
„Не сакам да одам на суд со мојот омилен клуб. Едноставно не можам да го направам тоа“.
И на крајот трите реченици со кои сепак дава надеж за фановите на Барселона.
„Јас ќе го дадам мојот максимум за овој тим. Ништо нема да се промени во мојот пристап и љубов кон клубот“.
„Почнуваме нова ера со нов тренер и нови идеи“.
„Ја сакам Барселона повеќе од се. Немаше да заминам за да најдам подобро место на светов, едноставно тоа е невозможно“, заврши Меси.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
