Кошаркарите на Еуро Никел ја забележаа 12. победа во сезоната откако во 21. коло славеа над Вардар со 96-79. „Сино-белите“ го контролираа денешниот меч од самото отварање на средбата па се до крајот, одиграа одлично во противничкиот рекет каде постигнаа 58 поени и сосема заслужено стигнаа до посакувната победа. Гостите во своите редови го имаа фантастичниот Дикембе Диксон кој го предводеше скопскиот тим со дабл-дабл од 41 поени и 11 скока, но Американецот немаше поддршка од своите противници.
Текот на натпреварот кавадарчани го назначија уште од самото отварање на мечот кога за нешто повеќе од пет минути игра стигнаа и до првата двоцифрена предност (16-6), но гостите успеаја да ја стабилизираат играта, а со тоа и да ја преполоват предноста во крајот на првите десет минути (20-15). Работите не се променија до полувремето до кое избраниците на Самарџиев продолжија да ја контролираат играта, а и покрај тоа што Еуро Никел во еден момент имаше и предност од единаесет поени, по 20. минути игра на семафорот стоеше предност од 43-35. Гостинот помотивирано влезе во второто полувреме и веќе во третата четвртина во неколку наврати стигна до негатива од еден напад. „Сино-белите“ одговорија на предизвикот, не дозволија целосно враќање во натпреварот па ја одржаа предноста и по третата четвртина (68-61), а добрата игра ја пренесоа и во последните десет минути во кои повторно стигнаа до двоцифрена предност, а овојпат „црвено-црните“ немаа сили да се изборат за нов егал.
Седум играчи во „сино-бело“ имаа двоцифрен број на поени, а Дарко Соколов беше прво име во домашниот состав со 20 поени, 9 скока и 5 асистенции, додека него го следеше Роберт Рикиќ со 18 поени и 8 скока. Кај гостите убедливо најрасположен беше Дикембе Диксон со 41 поен и 11 скока, додека Џуниус Провел додаде 15 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
