Кристијан Дисингер успеа да ги надмине проблемите со повредата и ќе му биде на располагање на стручниот штаб на Вардар за премиерниот меч од Лигата на шампионите против Монпелје. Германскиот ас поради повреда на зглобот на ногата мораше да биде заменет во раната фаза од мечот во СЕХА против Мотор, по што постоеја сериозни стравувања дека Вардар со ограничен ростер на таа позиција ќе мора да се снаоѓа во Франција, со оглед на фактот дека е повреден и Бразилецот Толедо.
Сепак, деталните прегледи по враќањето во Скопје покажале дека не станува збор за ништо посериозно, па Германецот ќе му се стави на располагање на тренерот Писонеро на тренинзите во следните денови, а потоа и ќе биде во комбинација за настап против Монпелје. Во тимот против екс-првакот на Европа ќе биде и Словенецот Скубе, кој поради полесна повреда не настапи на дуелот против Мотор на кој „црвено-црните“ го претрпеа првиот пораз во СЕХА-лигата.
Вардар и ланската сезона ја стартуваше со идентично гостување во Франција, а победата од 24-27 над Монпелје беше најава на извонредната година во која „црвено-црните“ стигнаа до втората титула европски првак.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
