Македонскиот кошаркарски суперлигаш ТФТ забележа уште еден пораз во БИБЛ лигата откако загуби на гостувањето во Бугарија против Берое со 91-90. Домашниот состав го наметна своето темпо од самиот почеток на натпреварот, па динамичната игра на домаќините и слабата одрбана на ТФТ резултиртаа со водство на Берое од 32-23 во првата четвртина. Ваквата одлична поставеност на тимот од Бугарија ја навести доминација над македонскиот состав и во продолжение.
Првите минути од втората четвртина беа доста тврди и за двата тима, домаќините направија неколку грешки во нападот, а гостите не останаа должни па им возвратија. Агресивноста и на двете екипи во одбраната резултираше со помал број на поени, но многу поголем број на фаули кои донесоа кошаркарите и на двете страни да бидат во бонус и често да се најдат пред линијата за слободни фрлања.
Домаќините продолжија во ист ритам и на почетокот на третата четвртина, неколку тројки во првите минути им овозможија да се одлепат и да ја зголемат разликата. ТФТ се повеќе губеше концентрација во одбраната и нападот, а вакиот начин на игра овозможи Берое рутински да ја заврши тертата четвртина со 31-25.
Последната четвртина беше и последната надеж на избраниците на Смилковски, но домаќините не попуштија и ја задржаа веќе обезбедената предност. Во последните минути имаше вистинска драма откако ТФТ успеа да намали на 85-87, но следуваше лесна акција за Берое и зголемување на предноста. На крај времето им пресуди на кошаркарите на ТФТ, па иако постигнаа тројка и намалија на еден поен разлика и резултат од 91-90, се слушна сирената која го означи и крајот на натпреварот. Бренден Бејли беше најрасположен во составот на ТФТ со 19 поена, 4 скока и 2 асистенции. Со овој пораз ТФТ дефинитивно ги загуби шансите за пласман во следната фаза од БИБЛ лигата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
