Кошаркарите на Барселона прокоцкаа вистинска шанса да слават на гостувањето против Реал Мадрид во дербито на 21. коло од Евролигата. Каталонците пред последната четвртина на мечот имаа и девет поени предност, има и четири поени водство во последната минута, но дозволија „кралевите“ да се изборат за продолжение во кое на крајот славеа со 91-86.
Каталонскиот тим на самиот почеток на натпреварот го презеде водството со постојана контрола на резултатот, па на полувремето имаше предност од 32-39.
Барселона предноста ја одржуваше и во второто полувреме па пред последната четвртина дојдоа и до девет поени разлика (50-59). Но, „кралевите“ никој никогаш не може да ги опише. Па, со неверојатен пресврт и серија од 19-8 во последната четвртина Реал Мадрид на три минути пред крајот дојде до предност од 69-67. Сепак, Каталонците со шест едноподруго поени повторно се вратија со предност од 69-73, за да домашните возвратат за 73-73 на 30 секунди до крајот. Откако Миротиќ згреши во следниот напад за Барселона, грешка и кај Реал за продолжение.
А, во продолжението доминација на Реал Мадрид. Се стекнаа домашните кошаркари брзо со предност која потоа ја одржуваа до крајот за конечна победа од 91-86.
Најефикасен во победничкиот тим беше Габриел Дек со 23 поени, а Серхио Љуљ заврши со 19 поени. Кај Барселона, Никола Миротиќ мечот го заврши со 17 постигнати поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
