Домагој Дувњак ги разреши сите дилеми околу својата иднина продолжувајќи ја соработката со Кил за уште две дополнителни сезони. Актуелниот договор на Хрватот истекуваше на крајот од сезонава, а со оглед на договорениот трансфер на Сагосен од ПСЖ се најавуваше дека Дувњак ќе си замине од таборот на „зебрите“. Сепак, ситуацијата експресно се промени, па одличниот бек денеска и официјално го стави потписот на новиот двогодишен договор со Кил.
„За мене Кил е најдобриот клуб во светот. Се враќаме на старите патеки, се бориме за трофеи и сакам да останам и да бидам дел од овој проект и во иднина. Моето семејство се чувствува одлично во овој град и не гледам зошто би менувал било што. Среќен сум што ќе продолжам да играм во сала во која редовно ја имаме поддршката од 10.000 навивачи на секој натпревар“ – изјави Дувњак по потписот на договорот.
Хрватот е член на Кил од 2014 година. Тој досега има одиграно 231 натпревар за бундеслигашот, притоа постигнувајќи 809 погодоци.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА