Фудбалската репрезентација на Македонија за еден месец ќе ја почне финалната трка за пласман во Лигата на нации. На 26 март во Скопје е закажан полуфиналниот дуел против Косово, а селекторот Игор Ангеловски и фудбалерите се надеваат дека пет дена подоцна ќе бидат дел и од финалната пресметка за пласман на ЕВРО 2020, против Грузија или против Белорусија.
Со оглед дека нема да има многу време за заеднички подготовки, селекторот Игор Ангеловски одлучи во живо да ја провери формата на поголем дел од репрезентативците. Беше во Унгарија каде го следеше настапот на Висар Муслиу и на Бобан Николов во дресот на Мол Фехервар, а потоа се упати и во Шпанија, каде го гледаше мечот меѓу Леванте и Реал Мадрид.
„Немаме време за заеднички подготовки, собирот ќе биде кус и веднаш следи дуелот со Косово. Но, во контакт сум со фудбалерите, се обидувам да ги следам и во живо настапите на поголем дел од нив. Бев во Унгарија и во Шпанија, следните активности се да ги гледам мечевите на Стефан Ристовски (Башакшехир – Спортинг Лисабон) и на Аријан Адеми и на Дарко Велковски (Динамо Загреб – Ријека). Имав во план да одлетам и за Италија, но поради последните проблеми со коронавирусот тоа сепак нема да може да се реализира. Драго ми е што најголем дел од репрезентативците играат стандардно во клубовите и се надевам дека ќе ги одминат повредите. Тоа е најважно, да ги имам сите на собир и подготвени за игра“, вели за ЕКИПА, селекторот Ангеловски.
Можеби најмногу загрижува навалната линија, Илија Несторовски има скромна минутажа во Удинезе во последниот период, а Александар Трајковски речиси и воопшто да не добива шанса во дресот на Мајорка.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
