Един Џеко го најави својот проштален натпревар за репрезентацијата на Босна и Херцеговина.
Брилијантниот центарфор успеа да ги однесе „змејовите“ на Светското првенство по вторпат во историјата, по што веќе и се најавуваше дека ќе се збогува со репрезентацијата.
Един Џеко ќе се збогува со дресот на репрезентацијата на Босна и Херцеговина на 2 октомври 2026 година, на натпреварот против Шведска.
„Понекогаш се прашував кога ќе дојде овој момент, но никогаш не можев да замислам колку емотивен ќе бидам додека ги пишувам овие зборови. На 2 октомври, против Шведска, ќе го одиграм мојот последен натпревар за нашата репрезентација. Ништо во мојата кариера не може да се спореди со гордоста што ја чувствував секогаш кога го облекував тој дрес. Ништо. Тоа беше мој сон од детството, сон што го носев со себе секој од 151-те пати кога имав чест да ја претставувам мојата земја на фудбалскиот терен. Секогаш бев горд што го носам, исто како и првиот пат. Многу работи се променија од тогаш, но чувствувам дека е време да се пензионирам. Тоа е затоа што секој пат го давав најдоброто од себе“, напиша Џеко на социјалните мрежи, и дополни:
„Играњето за мојата земја беше најемотивната привилегија што некогаш ми ја дал фудбалот. Квалификувањето на нашето прво светско првенство во 2014 година останува еден од најсреќните моменти во мојот живот како фудбалер. Емоциите што ги почувствував таа вечер откако постигнав гол против Велс, а потоа и во Зеница против Италија во март, ќе останат во моето срце засекогаш. Гледањето на мојот народ како слави на улиците на нашите градови беше уште еден неверојатен подарок што ми го даде фудбалот. Ќе има време да им се заблагодарам на сите што беа со мене и ме поддржаа за време на ова прекрасно патување. Засега, само сакам да бидете таму таа вечер против Шведска, да споделиме уште една емоција заедно… Бидејќи секој од овие неверојатни моменти е нешто што го живеевме заедно. И токму така сакам да ја доживеам мојата последна ноќ во дресот на националниот тим: со сите вас покрај мене, носејќи го дресот што го сакам од детството и ќе го сакам до крајот на мојот живот.“
Џеко одигра 151 натпревар во националниот тим на Босна и Херцеговина и постигна 73 гола.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
