Кожув ја прекина серијата од два пораза во низа откако во 19.коло славеше на гостувањето против Гостивар со 75-81. Гевгеличани го отворија натпреварот во фантастичен ритам во кој преку високата реализација во првата четвртина брзо стигнаа до голема предност, од која домаќините не успеаја да се вратат во игра и покрај налетот на почетокот на второто полувреме и самиот крај на натпреварот.
Гостите од Гевгелија го започнаа натпреварот во одлично напаѓачко темпо. „Црвено-белите“ ги служеше шутот во првите десет минути од средбата каде погодија и четири шута зад линијата 6,75, за разлика од домаќините кои се мачеа да го најдат својот ритам, па Кожув по 10. минути игра имаше предност од 10-29. Гостите не успеаја да ја пренесат добрата игра и до крајот на полувремето, а тоа го искористи Гостивар кој преку добрата одбрана го лимитираше Кожув на само 10 постигнати поени во продолжението од првото полувреме, а преку расположените Вокер и Тодоровиќ, „сино-белите“ ја намалија негативата на 29-41 на „големиот одмор“.
Кожув се мачеше и на почетокот на второто полувреме, но тоа не го искористија ниту избраниците на Србиновски кои и покрај тоа што ја сведоа негативата на осум поени, не успеаја да фатат и вистински учинок. Кожув ги консолидираше своите редови па веќе до 30. минута ја врати високата предност (48-62). Моментумот на „црвено-белите“ продолжи до самиот крај на средбата. Високиот пресинг на домашниот состав умешно го пробиваше Кожув и стигаше до лесни поени, па гостинскиот состав ја одржа предноста и стигна до осмата победа во сезоната и покрај тоа што Гостивар стигна и до негатива од само еден напад на 24 секунди пред крајот на средбата.
Александар Тодоровиќ беше првото име кај домашниот состав со 23 поени и 12 скока, Марјан Јанески додаде 14 поени, додека еден помалку забележа Џалон Фрајдеј. Џоџо Вокер натпреварот го заврши со 12 поени, додека дабл-дабл од 10 поени и 12 асистенции оствари и Александар Костоски.
Џош Скот беше предводникот на Кожув со 19 поени и 6 скока, дабл-дабл од 18 поени и 10 скока забележа Никола Силаџи, додека еден помалку додаде Димитар Караџовски кој имаше и 5 асистнеции. Двоцифрен беше и Лок кој натпреварот го заврши со 10 поени и 7 скокоа.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА