Кошаркарите на Фенербахче по Жалгирис се вториот учесник на фајналфор турнирот во Белград откако вечерва славеа на гостувањето против Басконија со резултат 83-92, добивајќи ја оваа четвртфинална серија со 1-3. Извлекувајќи поуки од поразот од пред два дена, избраниците на Обрадовиќ овојпат одиграа како што им доликува на актуелните европски шампиони, доминираа од почеток до крај и заслужено стигнаа до пласман на Ф4.
„Сино-жолтите“ уште во раната фаза на натпреварот го наметнаа своето темпо, добивајќи ја првата четвртина со 19-25, за потоа уште повеќе да доминираат во вториот дел од мечот, добивајќи го со 13-23. Искусен тим како Фенербахче знаеше како да ја одржи оваа предност, не дозволувајќи им на шпанските кошаркари ниту за момент да се надеваат на камбек, се до конечните 83-92.
Гудуриќ беше во главна улога со 22 поени, еден помалку постигна Мели, а двоцифрен ефект имаше и Калиниќ со 13 поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
