Нова извонредна партија на најдобриот македонски кошаркар Ненад Димитријевиќ во дресот на Уникс Казањ во полуфиналната серија од ВТБ лигата. Уникс во повеќе од драматичен меч триумфираше со 81-78 против Локомотив Кубан во петтиот натпревар од полуфиналето, благодарение на поените на Димитријевиќ на 14 секунди пред крајот со кој беше осигуран триумфот за водство сега од 3-2 во серијата.
Во максимално израмнет натпревар, на крај пресуди концентрацијата на домашните во финишот кои умешно дојдоа до победата, иако Локомотив имаа предност и од 72-75 на шест минути пред крајот. Но, благодарение на Димитријевиќ и Рејнолдс, Уникс Казањ дојде до победата со која сега е само на една победа до големото финале. Македонскиот кошаркар на 14 секунди пред крајот, реализираше две слободни фрлања за конечна победа од 81-78.
Димитријевиќ дуелот го заврши со „дабл-дабл“ ефект од 22 поени и 10 асистенции, дополнети и со четири скока и една украдена топка. Џејлен Рејнолдс исто така запиша „дабл-дабл“ од 30 поени и 11 скока. Кај гостите најдобар беше Карвел Андерсон со 20 постигнати поени.
Следниот шести натпревар од полуфиналната серија, која се игра во четири добиени меча, е на 19. мај во Кубан.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
