Натпреварот од Светското првенство во 2026 година меѓу Шпанија и Зеленортските Острови, кој заврши без голови, се најде под лупа поради невообичаени обрасци на обложување.
Ремито без голови меѓу Шпанија и Зеленортските Острови во првото коло од Светското првенство во 2026 година беше толку големо изненадување што автоматски го привлече вниманието на телото задолжено за следење на сомнителни уплати во спортското обложување.
Натпреварот првично беше означен со таканаречено „жолто предупредување“ од страна на „Копенхаген групата“, тело на Советот на Европа кое ги следи неправилностите на пазарот за обложување. Тоа значеше дека натпреварот бара дополнителна проверка поради неочекуваниот исход.
Според британските медиуми, на платформата за предвидувања базирана на криптовалути биле уплатени околу 3,6 милиони фунти на тоа дека Шпанија нема да победи. По анализата на обрасците на обложување, разузнавачките податоци и активноста на социјалните мрежи, истражителите заклучија дека нема докази за местење, но дека станува збор за една од најголемите сензации на турнирот.
Статистиката дополнително го потврди таквиот заклучок. Шпанија упати дури 27 удари кон голот, наспроти само шест на противникот, но ниту еден од седумте удари во рамките на голот не заврши во мрежата, благодарение на фантастичниот голман Возиња.
Искусниот голман одбрани речиси невозможни удари од Микел Ојарзабал, Емерик Лапорт и Феран Торес, кој еднаш ја погоди пречката.
Работната група на ФИФА за интегритет на натпреварувањата утврди дека немало сомнителни обрасци на обложување ниту какви било индиции за манипулација со исходот на натпреварот. Потоа, „Копенхаген групата“ го промени статусот на натпреварот од „жолт“ во „зелен“, што значи дека тој се смета за целосно регуларен.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
