Сонот стана реалност – Вардар на 3 и 4 јуни ќе биде дел од фајналфор турнирот во Лигата на шампионите, откако вечерва повторно го совлада Фленсбург (35-27) и апсолутно заслужено си го визираше местото меѓу најдобрите четири тима на Стариот континент. „Црвено-црните“ маестрално ја играат целата сезона, најпрвин го освоија првото место во групата, а со двете ракометни лекции проти Фленсбург само потврдија дека се дел од самиот „крем“ на европскиот ракомет. Гостите дојдоа во Скопје со надеж за изненадување и реванш, но сонот експресно им се урна како кула од карти, налетувајќи на максимално мотивираниот состав на Вардар, кој немаше намера да ја пропушти оваа шанса за историја.
Штербик го отвори мечот со интервенција по обидот на Јакобсон, а на спротивната страна Борозан беше прецизен, за прво водство на Вардар од 1-0. „Црвено-црните“ делуваа одлично во одбраната, сигурно и во нападот, па по неполни шест минути игра по двата гола на Шишкарев македонскиот првак поведе со 4-2. Одбраната 5-1 на чело со Канелјас функционираше подеднакво добро како и на стартот од првиот натпревар, но нападот не беше во посакуваниот ритам, па во 11. Минута гостите стигнаа до израмнување на 4-4.
Фленсбург имаше и напад за водство, но обидот на Сван за среќа заврши во дирекот. Во следниот напад Циндриќ беше прецизен за водство од 5-4, прекинувајќи ја серијата од седум минути без постигнат гол, воедно и изнудувајќи исклучување од Карлсон. „Црвено-црните“ поведоа со 6-4, но гостите со два седмерци останаа во натпреварот (6-5, па 7-6). Штербик продолжи да ги откажува крилата на Фленсбург, па водството се врати на 8-6, за потоа Циндри за првпат на мечот да донесе „плус три“ (9-6).
Гостите стануваа премногу нервони и конфузни во нападот, Вардар го искористи тоа, поведе и со 10-6, пред Врањеш да побара тајмаут. Могенсен погоди веднаш по тајмаутот, изнудувајќи и исклучување од Абутовиќ. Раул повлече вистински потег, па при 11-7 го стави Милиќ на голот наместо Штербик, а Србинот веднаш одбрани зицер на Могенсен. Данските судии се обидоа да му помогнат на гостинот, но Вардар беше посилен и од тие неправди, па на одмор замина со убедливи 15-10.
Слично како и на првиот натпревар, Фленсбург заигра подобро во вториот дел, ја намали разликата на три гола, но „вардарци“ имаа два значајни адути, Циндриќ во нападот и Штербик на голот, за пласманот на Ф4 да не биде загрозен. Врањеш зеде тајмаут при 22-17, но ситуацијата на теренот не се промени, „црвено-црната“ доминација продолжи, па на средина од полувремето резултатот веќе беше преубедливи 26-17, за нов тајмаут на гостинскиот тренер. Остатокот од мечот „вардарци“ го одиграа рутински, за конечна победа од 35-27 и историски пласман на македонскиот првак на фајналфор натпреварувањето во Лигата на шампионите.
Лука Циндриќ одигра уште еден фантастичен натпревар постигнувајќи седум гола, по пет пати прецизни беше Шишкарев и Душебајев, додека Борозан даде четири гола од исто толку обиди. Арпад Штербик повторно беше одличен на голот, со 11 успешни интервенции.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
