Новак Ѓоковиќ одигра уште еден импресивен меч на Вимблдон, пласирајќи се во осминафиналето откако вечерва без многу мака го совлада сонародникот Кецмановиќ со максимални 3-0 во сетови.
Новак беше перфектен во текот на целиот меч, отвори одлично поведувајќи со 6-3, а најимпресивно делуваше во вториот сет во кој не му остави на противникот да освои ниту еден гејм. Веднаш следеше брејк на стартот на третиот сет, имаше и убедливи 5-1 по кои следеше мало опуштање, за Ѓоковиќ сепак да го добие овој дел од мечот со конечни 6-4.
Следната задача дефинитивно ќе му биде потешка, ако се знае дека противник во осминафиналето ќе му биде 11. носител Де Минор од Австралија, кој денеска славеше со 3-0 на мечот со Холмгрен од Данска.
За одбележување е новиот одличен настап на Марин Чилиќ, хрватскиот ветеран триумфираше со 3-1 над Шпанецот Мунар и дојде до своето прво осминафинале на Вимблдон по пауза од осум години.
Најнеизвесно беше на дуелот меѓу Сонего и Накашима, на кој по огромна борба славеше италијанскиот тенисер Сонего, со тајбрејк во петтиот сет што го доби со 10-3.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
