Лина Ѓорческа на експресен начин стигна до полуфиналето на „Триглав опен“ што се игра во Скопје. Таа во четвртфиналето денеска за само 52 минути ја победи Сада Нахимана од Бурунди со 2-0 во сетови (6-0, 6-1).
Во текот на целиот меч македонската тенисерка беше доминантна и во ниту еден момент противничката не се закани. Првиот сет Ѓорческа го доби на убедлив начин со 6:0 во гемови. Серијата на гемови продоложи и во вториот сет кога македонската тенисерка водеше со 5:0, а потоа во шестиот гем на Нахимана го направи единствениот брејк, но пред се бидејќи Лина имаше три двојни сервис грешки во тој гем. Но, во следниот гем Ѓорческа направи ри-брејк за 6:1 и конечна победа од 2:0 во сетови.
Во мечот Ѓорческа имаше 7/7 искористеност на брејк топки и седум двојни сервис грешки, со два аса.
Во полуфиналето Ѓорческа ќе игра против Ива Приморац од Хрватска, која денеска ја елиминираше првата носителка Леолиа Жанжан од Франција – 2:0 во сетови (6-3 6-2). Во второто полуфинале ќе играат Јустина Микулските (9) од Литванија и Дејана Радановиќ (14) од Србија. Микулските ја победи Деа Херџелаш од БиХ со 2-0 во сетови (64 61), додека Радановиќ беше подобра од Ајла Аксу од Турција со истиот резултат 2-0 (63 62).
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
