Претседателот на Интернационалната ракометна федерација, Хасан Мустафа категоричен е кога станува збор за одржувањето на Светското првенство во јануари следната година во Египет.
„Првенството ќе биде одржано во Египет, и апсолутно немаме никаква намера да го одложиме поради коронавирусот. Државата е подготвена да го организира натпреварувањето. Убеден сум дека првенството во Египет ќе биде едно од најдобрите во историјата. Познати се поголемиот дел од партиципиентите а останува уште многу брзо да ги доделиме вајлд-картите“ – истакна Мустафа.
Првенството ќе се игра од 14. до 31. јануари 2021 година, и ќе биде прв шампионат со 32 репрезентации, место со досегашните 24 партиципенти.
Македонија е една од пет кандидати за добивање на двете вајлд-карти. Покрај Македонија, во игра за вајлд-карта од Европа се Русија, Србија, Црна Гора и Полска. Најголемите конкуренти на Македонија се Русија и Полска. Полјаците веќе почнаа и со отворен притисок кон ИХФ, нагласувајќи дека не смее да останат без настап на СП 2021 затоа што во 2023 година тие ќе бидат домаќини на ракометниот Мундијал.
„Ако Полска биде организатор на Мундијалот во 2023 година, тогаш нашата репрезентација треба да има привилегиран статус и да учествува на СП 2021“ – велат од Ракометната федерација на Полска.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА