Во таборот на израелската репрезентација како еден од своите најголеми адути за триумф на квалификацискиот натпревар против Македонија кој вечерва од 20:45 часот се игра во Бер Шева ги сметаат навивачите.
Според последните информации, продадени се 13.000 билети за дуелот кој ќе се игра на „Јаков Тарнер Тото“ стадионот во Бер Шева чиј капацитет е 16.000 седишта. Фактот дека натпреварите на израелската репрезентација на овој стадион секогаш се играат пред полн стадион беше и причината што Израелската федерација ја одбра Бер Шева за домаќин на натпреварот против Македонија.
„Навивачите ќе ни бидат повеќе од неопходни ако сакаме да дојдеме до триумф. Знаеме дека во Бер Шева секогаш имаме огромна поддршка од трибините, и верувам дека така ќе биде и против Македонија“ – истакна селекторот на Израел, Енди Херцог.
Израел на овој стадион играше минатата година во Лигата на нациите против Албанија кога славеше со 2-0. Тогаш натпреварот се одигра пред 15.000 гледачи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
